Nýuppgerðir manngerðir hellar við bæinn Ægissíðu nálægt Hellu á Suðurlandi hafa notið vinsælda meðal gesta að undanförnu, að því er fram kemur í Morgunblaðinu. „Þetta er nýr og spennandi áfangastaður og við höfum fengið marga gesti síðan við opnuðum aftur [eftir lokun vegna COVID-19-faraldursins],“ segir Árni Freyr Magnússon, einn leiðsögumannanna. Þetta er fjölskylduverkefni og aðgangseyrir verður notaður til að endurgera hina hellana.
Boðið er upp á leiðsögn um hellana um helgar kl. 14. Alls eru 12 þekktir manngerðir hellar við bæinn og hafa fjórir þeirra verið endurgerðir. Tveir hellanna eru meðal stærstu manngerðu hella sem fundist hafa á Íslandi.
Nöfn hellanna benda til þess að þeir hafi verið notaðir sem gripahús eða hlöður.
Hellarnir hafa lítið verið rannsakaðir og því er aldur þeirra enn ráðgáta. Í þeim hafa fundist krossar, fornar hellaristur og myndir, auk hillna og sæta sem höggvin hafa verið í veggina.
Einar Benediktsson skáld var þeirrar skoðunar að hellarnir væru frá því fyrir landnám og að írskir munkar hefðu upphaflega búið í þeim. Árni Freyr og kærasta hans, Álfrún Perla Þórhallsdóttir, en fjölskylda hennar á jörðina, telja að hellarnir séu að minnsta kosti frá tímabilinu frá 12. til 15. aldar.
Birtist á Iceland Monitor 20. júní 2020.